У аўтамабілі падазраванага ў наездзе на наведнікаў каляднага кірмашу ў Магдэбургу следчыя знайшлі тэстамент, піша Der Spiegel. У ім мужчына просіць, каб уся яго маёмасць перайшла Нямецкаму камітэту Чырвонага Крыжа, перадае RTVi.
Паводле звестак выдання, палітычных матываў у дакуменце не выявілі.
Падазраваны арандаваў машыну за тыдзень да наезду на натоўп, які ўлады акрэслілі як тэракт, піша Der Spiegel. Таксама ў артыкуле гаворыцца, што мужчына даў інтэрв'ю амерыканскаму антыісламскаму блогу, дзе захоплена выказваўся пра прадпрымальніка Ілана Маска і канспіролага Алекса Джонса.
Увечары 20 снежня чорны BMW наехаў на людзей на калядным кірмашы Магдэбурга. Машыну скіраваў у натоўп людзей кіроўца. У выніку загінула пяць чалавек, больш за 200 атрымала раненні. Улады назвалі тое, што адбылося, тэрактам.
Spiegel пісаў, што падазраваны ў наездзе — 50-гадовы доктар Талеб А., выхадзец з Саудаўскай Аравіі, які ў сакавіку 2006 года прыехаў у Германію на стажыроўку. Паводле звестак выдання, у ліпені 2016 года мужчыну быў нададзены статус уцекача ў ФРГ, бо на радзіме яму нібыта пагражала смяротнае пакаранне за «адступленне ад ісламу».
21 снежня газета Welt am Sonntag са спасылкай на ліст, напісаны берлінскім праваахоўнікам яшчэ восенню 2023 года, паведаміла, што нямецкую паліцыю спрабавалі папярэдзіць пра злачынныя планы выхадца з Саудаўскай Аравіі Талеба А. Паводле інфармацыі выдання, электронны ліст на англійскай мове напісала ў верасні мінулага года жанчына, што жыве, як мяркуецца, у Саудаўскай Аравіі. Яна прывяла асабістыя звесткі Талеба А., расказаўшы, што ён заявіў пра гатоўнасць забіць выпадковых людзей.
Крыніца Reuters з Саудаўскай Арабіі расказала, што Эр-Рыяд таксама заклікаў улады Германіі звярнуць увагу на мужчыну, бо той публікаваў у сацсетцы Х пасты экстрэмісцкага зместу.