У Глушкаўскім раёне Курскай вобласці падраздзяленні УСУ блізкія да таго, каб узяць у кальцо групоўку Узброеных сіл Расіі. Пра гэта паведамляе эксперт Bild па аналізе адкрытых звестак Юліян Рэпке.
Украінскія войскі ўзарвалі ўсе масты праз раку Сейм на поўначы Глушкаўскага раёна Курскай вобласці. Гэта можа адрэзаць групоўку УС РФ, бо раён з захаду і поўдня аточаны тэрыторыяй Украіны. Напярэдадні УСУ захапілі там вёскі Снагасць і Апанасаўка. Да ракі Сейм і закрыцця катла ім засталося 5 км. Паводле ўкраінскіх звестак, там знаходзіцца ад 2 да 3 тысяч расійскіх салдат.
Як паведамляе Юльян Рэпке, дзяржмяжа паміж Расіяй і Украінай на поўдні і захадзе катла падрыхтаваная да абароны. Але расіянам будзе цяжка абараняцца, калі УСУ пачнуць наступаць з усходу. Акрамя таго, на захадзе ўкраінцы ўжо перайшлі мяжу і ўзялі пад кантроль невялікі ўчастак тэрыторыі РФ на 15 кв. км да ракі Сейм. Там знаходзіцца хутар Атруба.
«У расіян цяпер просты выбар: ці змагацца і абараняць гэтую тэрыторыю, ці адступіць. Відаць, абодва варыянты для іх фатальныя. Але трэба наўпрост сказаць, што гэтая бітва не носіць вырашальнага характару. Бо мы не ведаем, як шмат сіл засталося ва Украіны», — заявіў Рэпке.
Ізаляваць частку Курскай вобласці
Між тым, як піша Forbes, УСУ спрабуюць ізаляваць каля 776 квадратных кіламетраў Курскай вобласці — паміж дзяржаўнай мяжой і ракой Сейм.
«Незразумела, колькі яшчэ мастоў — пастаянных ці часовых — украінскім войскам давядзецца разбурыць, каб эфектыўна ізаляваць вялікі ўчастак Курскай вобласці, прылеглы да цяперашняй зоны наступу. Але, імаверна, яны дамагліся вялікага прагрэсу», — адзначае выданне.
Спасылаючыся на спадарожнікавыя здымкі, Forbes адзначае, што тры масты, якія УСУ атакавалі паміж 16 і 19 жніўня, былі адзінымі буйнымі пастаяннымі будынкамі такога кшталту ў гэтым раёне.
Арміі РФ давядзецца зараз цалкам спадзявацца на часовыя пантонныя масты, якія даволі ненадзейныя і іх лягчэй разбурыць.
«Калі ўкраінцы сканцэнтравалі дастаткова разведвальных і ўдарных сродкаў, каб знішчыць тры пастаянныя масты за чатыры дні, то, відаць, няма прычын, з якіх яны не могуць таксама знішчыць якія-небудзь часовыя масты, што з’явяцца ў тым самым раёне», — піша Forbes.
