Падлетак, які нарадзіўся ў Лондане і праславіўся сваім майстэрствам у распаўсюдзе каталіцкага веравызнання ў інтэрнэце, стане царкоўным святым. Яго называюць інфлюэнсерам Бога, піша Руская служба Бі-бі-сі.
Карла Акуціс памёр у 2006 годзе ва ўзросце 15 гадоў, і гэта азначае, што ён стане першым міленіялам (чалавекам, што нарадзіўся ў пачатку 1980-х — канцы 1990-х гадоў), які будзе кананізаваны.
Папа Францішак прыпісвае яму другі цуд — ацаленне студэнта ўніверсітэта ў Фларэнцыі, у якога пасля траўмы галавы адбылося кровазліццё ў мозг.
Карла Акуціс быў залічаны да блаславёных — першы крок да святасці — у 2020 годзе, пасля таго як яму прыпісалі першы цуд — ацаленне бразільскага дзіцяці ад прыроджанага захворвання, якое пашкоджвае падстраўнікавую залозу.
Другі цуд быў ухвалены Папам пасля сустрэчы з аддзелам святых Ватыкана.
Калі ён будзе кананізаваны, пакуль не вядома.
Карла Акуціс памёр ад лейкеміі ў горадзе Монца ў Італіі, дзе пражыў большую частку свайго дзяцінства.
Яго цела было перавезенае ў Асізі праз год пасля смерці і цяпер выстаўленае на агляд публікі разам з іншымі рэліквіямі, звязанымі з ім.
Акрамя распрацоўкі вэб-сайтаў для свайго прыходу і школы юнак стаў вядомы тым, што запусціў сайт, закліканы дакументаваць кожны паведамлены эўхарыстычны цуд. Сайт быў запушчаны за некалькі дзён да яго смерці.
Мянушку Акуціса, Інфлюэнсер Бога, далі яму пасля яго смерці, дзякуючы той працы, якую ён зрабіў.
Яго сайт перакладзены на некалькі моваў і выкарыстоўваецца ў якасці асновы для выставы, што аб’ездзіла ўвесь свет.
Пра яго жыццё памятаюць і ў Вялікабрытаніі, дзе ў 2020 годзе арцыбіскуп Бірмінгемскі заснаваў прыход Блаславёнага Карла Акуціса, які ўключае цэрквы ў Вулверхэмптане і Уомбарне.
А ў Гротэ Карфін, рымска-каталіцкай святыні ў Мазэрвеле, ёсць статуя будучага святога.
Цуды звычайна даследуюцца і ацэньваюцца некалькіх месяцаў, пры гэтым чалавек атрымлівае права на званне святога пасля таго, як на яго імя будзе два цуды.
Каб палічыць нешта цудам, звычайна патрабуецца дзеянне, якое выходзіць за рамкі таго, што магчыма ў свеце, напрыклад, раптоўнае ацаленне чалавека, якога лічаць блізкім да смерці.