Украінскі OSINT-праект DeepState апублікаваў відэа ўдару па палігоне, дзе знаходзіліся падраздзяленні арміі РФ. Паводле звестак следчых, гэта адбылося паблізу вёскі Пода-Калінаўка на левым беразе Дняпра акупаванай часткі Херсонскай вобласці. У аператыўным камандаванні «Поўдзень» інфармацыю пацвердзілі.
«Кажуць, кіраўніцтва групоўкі расійскіх акупацыйных войскаў „Днепр“ прыехала на палігон паглядзець, як будуць „зачышчаць“ Крынкі… бо Шайгу расказваў, а не паказваў Шайгу. Далучыліся да феерычнага шоу. Мы ж папярэджвалі: гарэць вам у пякельным агні… Сказана — зроблена!» — такі каментар пад гэтым жа відэа з’явіўся ў тэлеграм-канале Сіл абароны поўдня Украіны.
Прэс-сакратар АК «Поўдзень» Наталля Гумянюк у эфіры тэлеканала «Кіеў 24» заявіла, што не будзе раскрываць падрабязнасці таго, чым быў нанесены ўдар.
«Праца была праведзеная досыць эфектыўна, прынамсі 60 захопнікаў дакладна ўжо больш не вернуцца на баявыя пазіцыі, а астатнія звесткі мы яшчэ даразведаем», — расказала Гумянюк.
У Міністэрстве абароны Расіі ўдар па палігоне не каментавалі.
Напярэдадні была распаўсюджаная інфармацыя, што УСУ нанеслі ўдар па палігоне расійскай арміі каля вёскі Трудаўскае ў Валнавахскім раёне Данецкай вобласці. «Важные истории» пішуць, што ім удалося верыфікаваць спіс 68 загінулых там расійскіх вайскоўцаў.
20 лютага міністр абароны Расіі Сяргей Шайгу далажыў Уладзіміру Пуціну пра ўзяцце пад кантроль вёскі Крынкі, дзе знаходзіўся плацдарм УСУ. У аператыўным камандаванні «Поўдзень» гэтую заяву абверглі. У Амерыканскім інстытуце па вывучэнні вайны таксама адзначылі, што, мяркуючы з наяўных візуальных доказаў з адкрытых крыніц, УСУ працягваюць утрымліваць абмежаваны плацдарм у гэтым раёне.
«Крэмль, імаверна, заўчасна заявіў пра захоп Расіяй вёскі Крынкі, каб узмацніць жаданы інфармацыйны эфект напярэдадні прэзідэнцкіх выбараў», — адзначылі аналітыкі ISW.