Блізкія да расследавання крыніцы іспанскага агенцтва EFE пацвердзілі, што застрэлены 13 лютага ў гаражы ў Вільяхаёсе мужчына — расійскі лётчык Максім Кузьмінаў, які перагнаў верталёт Мі-8 УС РФ ва Украіну.
Суразмоўцы выдання, блізкія да расследавання, паведамілі, што высветліць яго асобу ўдалося не адразу з прычыны падробленых дакументаў на імя 33-гадовага ўкраінца (Кузьмінаву 28 гадоў). Пры гэтым суразмоўцы агенцтва сцвярджаюць, што забіты — расійскі пілот.
Нагадаем, 19 лютага з’явіліся паведамленні пра тое, што 28-гадовага Кузьмінава забілі ў іспанскім горадзе Вільяхаёса ў правінцыі Алікантэ 13 лютага. Адзначалася, што паліцыя налічыла на целе не менш за 12 кулявых адтулін, таксама пры забітым знайшлі 100 000 еўра.
Інфармацыю пра гібель Кузьмінава пацвердзіў прадстаўнік ГУР Андрэй Юсаў.
У кастрычніку 2023 года на канале «Расія-1» выйшаў рэпартаж, у якім неназваныя байцы спецназа ГРУ заявілі, што лётчык Кузьмінаў «не дажыве да суда». Журналіст за кадрам адзначыў, што загад пра фізічную ліквідацыю Максіма Кузьмінава ўжо атрыманы, і яго выкананне — толькі пытанне часу. У адказ вайскоўцы паабяцалі пакараць лётчыка-перабежчыка.
Расійскі лётчык Максім Кузьмінаў сагнаў верталёт Мі-8 і паспяхова прызямліў яго на тэрыторыі Украіны. Пілот дзейнічаў па папярэдняй дамоўленасці з Галоўным упраўленнем разведкі Украіны (ГУР), палёт праходзіў на звышнізкай вышыні, каб яго не заўважылі па радарах. Аперацыя атрымала назву «Сініца», ГУР лічыць яе самай паспяховай з пачатку поўнамаштабнага ўварвання. Акрамя верталёта Кузьмінаў перадаў УСУ сакрэтныя дакументы. Двое чальцоў экіпажа верталёта не ведалі пра планы Кузьмінава і былі забітыя амаль адразу пасля прызямлення. За верталёт Кузьмінаву абяцалі 500 тысяч даляраў узнагароды.