У Міністэрстве абароны Расіі заявілі пра знішчэнне ў Данецкай і Луганскай абласцях пяці ўкраінскіх дыверсійна-разведвальных груп. Ва ўкраінскім Генштабе паведамілі, што расійскія войскі працягваюць штурмаваць Мар'інку. У амерыканскім Інстытуце па вывучэнні вайны адзначаюць, што Яўген Прыгожын выкарыстоўвае захоп Бахмута для ўзмацнення свайго ўплыву ў Расіі.
Расказваем пра галоўнае са зводак штабоў і высноваў экспертаў на 456-ы дзень вайны ва Украіне.
Генштаб УСУ: Знішчылі чатыры важныя цэлі праціўніка
Расійскія войскі працягваюць засяроджваць асноўныя намаганні на Купянскім, Ліманскім, Бахмуцкім, Аўдзееўскім і Мар'інскім напрамках. На названых участках фронту за мінулыя суткі адбылося 28 баявых сутыкненняў. Пра гэта паведамляе Генштаб УСУ ў ранішняй зводцы.
— За мінулыя суткі праціўнік нанёс 30 авіяцыйных удараў і правёў 39 абстрэлаў з рэактыўных сістэм залпавага агню па пазіцыях УСУ і населеных пунктах.
— На Северскім і Слабажанскім напрамках расіяне нанеслі авіяцыйны ўдар па Юнакоўцы Сумскай вобласці, з мінамётаў і артылерыі абстралялі 19 населеных пунктаў Чарнігаўскай і Сумскай абласцей, а таксама на Харкаўшчыне.
— На Купянскім напрамку расійскія войскі спрабавалі палепшыць сваё тактычнае становішча. Вялі беспаспяховыя наступальныя дзеянні ў раёне Масютоўкі. Нанеслі авіяўдар у раёне Кіслоўкі. Артылерыйскім і мінамётным абстрэлам падвергліся дзевяць населеных пунктаў Харкаўскай і Луганскай абласцей.
— На Ліманскім напрамку за мінулыя суткі расійскія войскі наступальных дзеянняў не вялі. Нанеслі авіяўдар у раёне населенага пункта Дзіброва. З артылерыі абстралялі чатыры населеныя пункты Луганскай вобласці і Тарскае Данецкай вобласці.
— На Бахмуцкім напрамку расійскія войскі беспаспяхова спрабавалі наступаць у кірунку Іванаўскага. Нанеслі авіяўдар у раёне Белай Гары. Абстралялі 13 населеных пунктаў Данецкай вобласці.
— На Аўдзееўскім напрамку праціўнік вёў наступальныя дзеянні ў кірунку населеных пунктаў Новакалінава і Аўдзееўка, але поспеху не меў. Нанёс авіяўдары па раёнах трох населеных пунктаў, абстраляў — пяць.
— На Мар'інскім напрамку падраздзяленні Сіл абароны адбілі шматлікія расійскія атакі ў раёне горада Мар'інка. Праціўнік нанёс авіяўдары па раёнах двух населеных пунктаў, абстраляў з артылерыі — чатыры.
— На Шахцёрскім напрамку расійскія войскі абстралялі тры населеныя пункты.
— На Запарожскім і Херсонскім напрамках расіяне абараняюцца. Абстралялі 14 населеных пунктаў Данецкай, Запарожскай, Херсонскай абласцей і горад Херсон.
— Авіяцыя Сіл абароны нанесла сем удараў па раёнах канцэнтрацыі асабовага складу і ваеннай тэхнікі расійскіх войскаў.
— Знішчаныя тры ўдарныя БПЛА тыпу Shahed і разведвальны дрон тыпу «Арлан-10».
— Падраздзяленні ракетных войскаў і артылерыі пабілі два раёны канцэнтрацыі жывой сілы, чатыры склады боепрыпасаў, станцыю радыёэлектроннай барацьбы, чатыры артылерыйскія падраздзяленні на агнявых пазіцыях і яшчэ чатыры важныя цэлі расійскіх войскаў.
Мінабароны Расіі: Перахапілі восем рэактыўных снарадаў HIMARS
У Міністэрстве абароны Расіі заявілі, што на Данецкім напрамку знішчылі два склады з боепрыпасамі 80-й дэсантна-штурмавой і 110-й механізаванай брыгад УСУ.
— На Купянскім напрамку ўдарамі авіяцыі і агнём артылерыі Заходняй групоўкі войскаў пабітыя падраздзяленні УСУ ў раёнах населеных пунктаў Масютоўка, Цімкаўка, Катляроўка Харкаўскай вобласці і Стальмахоўка Луганскай вобласці. У раёнах населеных пунктаў Навамлынск, Сінькоўка Харкаўскай вобласці, Іванаўка Данецкай вобласці і Розаўка Луганскай вобласці спыненыя дзеянні чатырох украінскіх дыверсійна-разведвальных груп.
За суткі страты УСУ на гэтым напрамку склалі да 190 вайскоўцаў, тры аўтамабілі, а таксама гаўбіца Д-30.
— На Чырвона-Ліманскім напрамку авіяцыяй, агнём артылерыі і цяжкіх агнямётных сістэм групоўкі войскаў «Цэнтр» нанесенае паражэнне падраздзяленням УСУ ў раёнах населеных пунктаў Ямполаўка Данецкай вобласці, Райгародка і Чырвоная Дзіброва Луганскай вобласці. Знішчаныя да 65 украінскіх вайскоўцаў, тры пікапы, самаходная артылерыйская ўстаноўка «Гваздзік», а таксама гаўбіцы Д-20 і Д-30.
— На Данецкім напрамку ў выніку ўдараў авіяцыі і артылерыі, актыўных дзеянняў падраздзяленняў Паўднёвай групоўкі войскаў за мінулыя суткі знішчаныя да 270 украінскіх вайскоўцаў, тры баявыя браніраваныя машыны, два аўтамабілі, а таксама гаўбіца Д-30. Акрамя таго, знішчаныя два склады з боепрыпасамі 80-й дэсантна-штурмавой і 110-й механізаванай брыгад УСУ ў раёнах населеных пунктаў Ступачкі і Аўдзееўка Данецкай вобласці.
— На Паўднёва-Данецкім і Запарожскім напрамках ударамі авіяцыі, агнём артылерыі і цяжкіх агнямётных сістэм групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Новаміхайлаўка, Навасёлка Данецкай вобласці, Малая Такмачка і Несцяранка Запарожскай вобласці. У раёне населенага пункта Уладзіміраўка Данецкай вобласці спыненыя дзеянні ўкраінскай дыверсійна-разведвальнай групы.
За суткі на гэтых напрамках страты УСУ склалі да 110 вайскоўцаў, чатыры аўтамабілі, а таксама дзве гаўбіцы Д-30.
— На Херсонскім напрамку ў выніку агнявога паражэння за суткі знішчаныя да 25 украінскіх вайскоўцаў, два аўтамабілі, а таксама самаходная артылерыйская ўстаноўка «Гваздзік».
Усяго за суткі, паводле МА РФ, пабітыя 95 артылерыйскіх падраздзяленняў, жывая сіла і ваенная тэхніка УСУ ў 102 раёнах. Сродкамі СПА перахопленыя восем рэактыўных снарадаў сістэмы залпавага агню HIMARS. Знішчаныя 28 беспілотных лётных апаратаў.
Інстытут па вывучэнні вайны: Захоп Бахмута надаў Прыгожыну смеласці
Абмеркаванне стратаў, якія ПВК Вагнера панесла ў баях за Бахмут, ссунула акцэнт з абмеркавання важнасці захопу горада. Пра гэта гаворыцца ў свежай справаздачы амерыканскага Інстытута па вывучэнні вайны. Кіраўнік ПВК Яўген Прыгожын у інтэрв'ю паведаміў, што вагнераўцы страцілі ў баях за Бахмут 10 тысяч сваіх баевікоў і 10 тысяч завербаваных зняволеных. Расійскія ваенныя блогеры «неадкладна ўхапіліся» за паведамленні пра страты, тым самым зрушыўшы агульнарасійскую размову з абмеркавання важнасці захопу Бахмута, адзначаюць у Інстытуце. Так, расійскі палітык Віктар Алксніс заўважыў, што савецкая армія страціла значна менш салдат (15 051 чалавек) за дзевяць гадоў вайны ў Афганістане. Ігар Гіркін дапусціў, што рэальныя страты могуць быць нашмат вышэйшыя. Ён нагадаў, што з 50 000 навабранцаў, атрыманых «Вагнерам» з турмаў, 10 000 загінулі ў баі, а 26 000, як паведамляецца, былі памілаваныя і вярнуліся ў Расію, у выніку чаго «знікла» 14 000 зняволеных. Гіркін выказаў здагадку, што большая частка з гэтых 14 000 зніклых без вестак, магчыма, таксама былі забітыя ў баі, і заявіў, што «Вагнер», імаверна, страціў больш за 40 000 чалавек забітымі ў баі.
Зрушыўшы размову ў бок абмеркавання стратаў, Прыгожын пазбавіў Мінабароны Расіі магчымасці асвятляць перамогу ў Бахмуце ў станоўчым ключы. Разам з тым ён выкарыстоўвае ўяўленне пра тое, што «Вагнер» адыграў галоўную ролю ў захопе Бахмута, каб узмацняць свой уплыў. Заявы Прыгожына пра тое, што «для выратавання Расіі» неабходна ўвесці ваеннае становішча, правесці некалькі хваляў мабілізацыі, у тым ліку эканамічнай, закліканы да таго, каб знайсці водгук сярод выбаршчыкаў, зацікаўленых «у ідэалогіі нацыянальнай перавагі Расіі, савецкай агрэсіўнай сілы і сталінскага таталітарнага кантролю», лічаць у ISW. Захоп Бахмута, імаверна, надаў смеласці Прыгожыну больш адкрыта дэманстраваць свае амбіцыі, не баючыся сапсаваць адносіны з Крамлём.
Аналітыкі таксама адзначаюць, што расійскія крыніцы працягвалі рэагаваць на рэйд РДК і Легіёна «Свабода Расіі» ў Белгародскую вобласць. Міністр абароны Расіі Сяргей Шайгу заявіў, што памежнікі Заходняй вайсковай акругі выціснулі дыверсантаў з Белгародскай вобласці, забіўшы 70 чалавек асабовага складу і знішчыўшы іх аўтамабілі і бранятэхніку. Некаторыя ваенныя блогеры раскрытыкавалі неэфектыўнасць расійскіх памежнікаў і задаліся пытаннем, чаму яны дазволілі РДК і ЛСР прарвацца на расійскую тэрыторыю і знаходзіцца ў памежных раёнах два дні. Іншыя блогеры крытыкавалі расійскія сілы за тое, што яны не падтрымлівалі «нармальнай сувязі і ўзаемадзеяння» з памежнікамі, што стварала цяжкасці ў адбіцці атакі. Блогеры таксама хвалілі губернатара Белгародскай вобласці Вячаслава Гладкова за паводзіны ў нетыповай сітуацыі.
На што яшчэ звярнулі ўвагу эксперты:
- расійскія войскі правялі абмежаваныя наземныя атакі на паўночны ўсход ад Купянска і на мяжы Сватава — Крамянная;
- расійскія сілы працягвалі абмежаваныя наземныя атакі на ўскраінах Бахмута і ўздоўж лініі Аўдзееўка — Данецк;
- расійскія сілы працягваюць абстрэльваць украінскія пазіцыі на поўдні Украіны авіябомбамі ФАБ-500;
- міністр абароны Расіі Сяргей Шайгу заявіў 24 траўня, што больш за 120 000 расійскіх вайскоўцаў прайшлі падрыхтоўку з пачатку поўнамаштабнага ўварвання Расіі ва Украіну;
- Савет Федэрацыі ўхваліў закон пра правядзенне выбараў на тэрыторыях, якія знаходзяцца на ваенным становішчы.