У Беларусі цяпер жыве менш за 8,8 млн чалавек, вынікае са службовага ліста намесніка старшыні Камітэта дзяржкантролю Станіслава Наркевіча Савету міністраў. Копію дакумента, складзенага ў лістападзе гэтага года, перадало «Позірку» аб’яднанне былых сілавікоў BELPOL.
У лісце гаворка ідзе пра выкананне даручэння Аляксандра Лукашэнкі па забяспечанні да 2025 года «ўсіх спажыўцоў якаснай пітной вадой». Сярод іншага прыводзіцца статыстыка водазабяспечання «ў цяперашні час».
«Паводле наяўнай у камітэце інфармацыі», гаворыцца ў дакуменце, цяпер «у рэспубліцы паслуга водазабяспечання прадстаўляецца 8,6 млн чалавек, у тым ліку арганізацыямі жыллёва-камунальнай гаспадаркі — 8,4 млн, іншых сфер — 0,2 млн».
Пры гэтым, як удакладняецца, «забяспечанасць спажыўцоў водазабяспечаннем пітной якасці па рэспубліцы дасягнула парадку 98%».
З гэтых звестак вынікае, што ўсяго ў Беларусі ў лістападзе жыло каля 8,78 млн чалавек (з улікам акругленняў).
Паводле звестак Белстата на 1 студзеня 2024 года, насельніцтва Беларусі склала 9 155 978 чалавек. Гэта на 44 639 менш, чым за год да таго. Фактычна знік цэлы райцэнтр — прыкладна такі, як Ваўкавыск ці Слонім. З 2019 года колькасць беларусаў зменшылася на 257 468 чалавек. Гэта як Пінск, Жлобін і Слуцк разам узятыя.
Пры гэтым афіцыйная статыстыка не ўлічвае беларусаў, якія з’ехалі з краіны за апошнія некалькі гадоў. У Дэпартаменце па грамадзянстве і міграцыі МУС паведамлялі, што ў 2021−2022 гадах з’ехала больш за 200 тысяч чалавек. Раней намеснік міністра ўнутраных спраў Мікалай Карпянкоў ацэньваў міграцыю ў 350 тысяч салавек. Старшы даследчык Цэнтра новых ідэй Генадзь Коршунаў называў адток людзей з 2020 года ў «500−600 тысяч чалавек».
З улікам тых, хто з’ехаў, хутчэй за ўсё, у Беларусі можа жыць менш за 9 млн чалавек — такія разлікі прыводзілі эксперты BEROC.