У некаторых навучэнцаў школы № 165 Мінска выявілі кішачную інфекцыю. Дырэктарка навучальнай установы Наталля Зялкоўская расказала агенцтву «Мінск-навіны» падрабязнасці інцыдэнту.
Першыя паведамленні пра кепскае самаадчуванне дзяцей з’явіліся ў бацькоўскіх чатах яшчэ 9 студзеня.
— Дзеці скардзіліся на галаўны боль і ваніты. Пасля 20.00 некаторыя бацькі напісалі пра тое, што выклікалі дзецям хуткую дапамогу ў сувязі з пагаршэннем іх стану, — адзначыла Наталля Зялкоўская.
У 22.00 такія ж сімптомы з’явіліся і ў некаторых навучэнцаў другой змены.
Нагадаем, пра выяўленне кішачнай інфекцыі ў некаторых вучняў сярэдняй школы № 165 Мінска 10 студзеня паведаміла прэс-служба Мінздароўя. Дзеці, у якіх былі выяўленыя сімптомы кішачнай інфекцыі, «змешчаныя на даабследаванне ў адну са сталічных бальніц».
— Усе яны адчуваюць сябе нармальна. Іх стан стабільны. Праводзіцца неабходнае лячэнне і даабследаванне, — сказала БЕЛТА прэс-сакратар Мінздароўя Юлія Барадун.