Аляксандр Лукашэнка растлумачыў, чаму ў Беларусі працягваюць адзначаць Дзень Кастрычніцкай рэвалюцыі, перадае яго прэс-служба.
«Мы на 7 лістапада заўсёды (партыя нас так вучыла) рабілі народу падарунак. І канец года практычна, і сельгасработы завяршаюцца. І адна з матывацый, каб пакінуць гэтае свята, У мяне была акурат гэтая: прывыклі людзі атрымліваць падарункі ад улады, адно ад аднаго — давайце пакінем», — расказаў Лукашэнка.
Ён адзначыў, што ў Беларусі штогод да 7 лістапада адкрываюцца новыя аб’екты: ад дзіцячых садкоў да буйных вытворчасцяў касмічных маштабаў.
«Гэтым перш за ўсё я аргументаваў тое, што мы гэтае свята захаваем», — рэзюмаваў Лукашэнка.
Нагадаем, сёння ён афіцыйна запусціў вытворчасць Беларускай нацыянальнай біятэхналагічнай карпарацыі (якая працуе ўжо не першы месяц), летась Лукашэнка напярэдадні гадавіны Кастрычніцкай рэвалюцыі адкрыў кардыяцэнтр «еўрапейскага ўзроўню» ў Магілёве.
Пазалетась, у 2020-м, — Беларускую атамную станцыю. Пра яе ён успомніў і сёння.
«Цяпер вы зразумелі, што атамная станцыя — гэта падарунак Беларусі? Гэта выратаванне, таму што электрычнасць сёння на Захадзе эканомяць як толькі могуць», — сказаў Лукашэнка.
Аднак ён не згадаў, што з моманту адкрыцця станцыя прастойвае больш за 52% часу праз шматлікія «выпрабаванні» і «планавыя рамонты».