Польскі суддзя Томаш Шміт даў у Мінску прэс-канферэнцыю, падчас якой папрасіў прытулку ў беларускіх уладаў. Ён заявіў, што на радзіме «падвяргаўся пераследу і пагрозам за самастойную палітычную пазіцыю», перадае БЕЛТА. Між тым у Польшчы Шміт быў замяшаны ў так званым хейтарскім скандале з удзелам сваёй жонкі, праз што быў часова адхілены ад сваіх абавязкаў.
Томаш Шміт заявіў, што з’ехаў з Польшчы ў Беларусь праз ціск і «з прычыны нязгоды з палітыкай і дзеяннямі ўладаў» сваёй краіны. Паводле яго, на радзіме ён «падвяргаўся пераследу і пагрозам за самастойную палітычную пазіцыю».
Шміт заявіў, што адмаўляецца ад пасады на знак пратэсту супраць палітыкі польскіх уладаў, «якія пад уплывам ЗША і Вялікабрытаніі вядуць краіну да вайны», і папрасіў палітычнага прытулку ў Беларусі.
На радзіме Томаш Шміт працаваў у ваяводскім адміністрацыйным судзе Варшавы, узначальваў юрыдычны аддзел у Нацыянальнай радзе суддзяў Польшчы, займаў іншыя пасады ў польскай судовай сістэме і органах юстыцыі.
У Польшчы ў 2019 годзе ўспыхнуў так званы хейтарскі скандал, у якім быў замяшаны Томаш Шміт. Ён пачаўся з таго, што нейкая жанчына пад псеўданімам Эмі (або Маленькая Эмі) цягам некалькіх месяцаў пісала ў сацсетках пасты і рассылала лісты з нападкамі на суддзяў, якія ў сваю чаргу выступалі супраць судовай рэформы, ініцыяванай «Правам і справядлівасцю» (партыяй, якая кіравала ў той час).
Пасля Эмі сцвярджала, што атрымала гатовы кампрамат на суддзяў у Міністэрстве юстыцыі Польшчы, частку дакументаў таксама меркавалася перадаць журналістам праўладных СМІ для публікацыі ў прэсе. Польскія следчыя прыйшлі да высновы, што гэта частка запланаванай уладамі кампаніі па дыскрэдытацыі «непакорлівых» юрыстаў.
Як высветлілася, Эмі насамрэч завуць Эмілія Шміт і яна была замужам за Томашам Шмітам. Жанчына сцвярджала, што яе муж быў адным з тых, хто ўцягнуў яе ў «хейтарскі скандал». Яна казала, што ад яе патрабавалася толькі выкладваць у інтэрнэце перададзеную ёй інфармацыю з дыскрэдытацыяй суддзяў, сапраўднасць гэтых звестак сама Эмілія не правярала.
Пасля таго як гісторыя набыла агалоску, Томаш Шміт таксама публічна выказаўся пра свае адносіны з Эміліяй, абвінаваціўшы яе ў распадзе шлюбу і апісаўшы экс-жонку як здрадніцу і алкагалічку.
Скандал таксама адбіўся на кар’еры Шміта — ён быў выключаны з Нацыянальнай рады суддзяў Польшчы і часова адхілены ад службы ў ваяводскім адміністрацыйным судзе Варшавы, пачалося разбіральніцтва. Пазней дысцыплінарны суд дазволіў Шміту вярнуцца да сваіх абавязкаў, аднак з агаворкай, што так і не прыняў канчатковага рашэння пра вінаватасць ці невінаватасць суддзі ў дысцыплінарным правапарушэнні.
Пасля гэтага Томаш Шміт прызнаваўся, што баіцца магчымай кампаніі дыскрэдытацыі, разгорнутай ужо супраць яго самога. «Я хачу жыць нармальным жыццём. Я страціў усё што мог. Сваю сям’ю і прафесійнае становішча», — казаў ён.
Нагадаем, Томаш Шміт — не першы паляк, які прасіў прытулак у Беларусі. Адным з яго папярэднікаў быў польскі салдат Эміль Чэчка, які, паводле інфармацыі беларускіх уладаў і СМІ, уцёк у Беларусь 16 снежня 2021 года — падчас міграцыйнага крызісу на мяжы Беларусі і ЕС. Ён дэзерціраваў са свайго войска (польскія ўлады заяўлялі, што на радзіме ў яго праблемы з законам і яму пагражаў суд). У Польшчы ў дачыненні да Чэчкі распачалі крымінальную справу за дэзерцірства. У сувязі з інцыдэнтам былі звольненыя яго камандзіры.
Беларуская прапаганда актыўна выкарыстоўвала хлопца ў сваіх мэтах: ён даваў інтэрв'ю, расказваючы пра масавыя забойствы мігрантаў і валанцёраў польскімі вайскоўцамі, пра тое, што і сам расстрэльваў мігрантаў. Паводле Чэчкі, ён падаў заяву ў Гаагскі трыбунал, каб «польскае грамадства даведалася праўду пра сітуацыю, якая адбываецца на мяжы». Ва ўпраўленні Вярхоўнага камісара ААН па правах чалавека (УВКПЧ ААН) правялі праверку і не знайшлі пахаванняў мігрантаў на польска-беларускай мяжы, пра якія казаў Чэчка.
У сакавіку 2022 года Эміля Чэчку знайшлі павешаным. Яго пахавалі ў Беларусі.
Яшчэ адным грамадзянінам Польшчы, які папрасіў прытулку ў нашай краіне, у чэрвені 2022 года стаў актывіст Марцін Мікалаек. Сам ён лічыць сябе рускім і з’яўляецца адкрытым адэптам «рускага свету», а ў Польшчы нярэдка ўдзельнічаў у прарасійскіх акцыях.
Чытайце таксама
