На сайце Парку высокіх тэхналогій у раздзеле «Кіраўніцтва» з’явілася абноўленая інфармацыя. Кіраўніком Сакратарыята Назіральнага савета ПВТ стаў Аляксандр Базанаў. На гэта звярнула ўвагу выданне kv.by.
Прэс-служба ПВТ пакуль не абвясціла пра новага кіраўніка афіцыйна, але крыніцы, якія маюць інфармацыю, паведамілі, што рашэнне прынялі яшчэ на мінулым тыдні. Афіцыйны каментар ад Парку выданню атрымаць не ўдалося.
Імя ранейшага дырэктара ПВТ, Усевалада Янчэўскага, знікла са старонкі «Кіраўніцтва». Пра яго прызначэнне на нейкую іншую пасаду нічога не паведамлялася.
Магчыма, гэта звязана з рэарганізацыяй ПВТ — яна прадугледжаная красавіцкім указам Аляксандра Лукашэнкі. Дакумент прадугледжваў, што ў Парку высокіх тэхналогій з’явіцца новая кіраўнічая кампанія. Яна мусіць замяніць адміністрацыю ПВТ, якую вырашылі далучыць да Сакратарыята Назіральнага савета.
Хто такі Базанаў
Аляксандр Базанаў скончыў Полацкі дзяржаўны ўніверсітэт. Працаваў на розных пасадах у КДБ, Дзяржаўным сакратарыяце Савета бяспекі Беларусі, МЗС і апараце Савета Міністраў Беларусі. З лістапада 2010 года працаваў дырэктарам інфармацыйна-аналітычнага цэнтра пры адміністрацыі Лукашэнкі.
Хто такі Янчэўскі
18-гадовы Усевалад Янчэўскі быў самым маладым удзельнікам каманды Аляксандра Лукашэнкі на яго першых прэзідэнцкіх выбарах. Пасля таго як той перамог, стаў адным з кіраўнікоў моладзевай арганізацыі «Прямое действие». У 1997 годзе большая частка ўдзельнікаў гэтай структуры на чале з Янчэўскім перайшла ў створаны ў падтрымку Лукашэнкі Беларускі патрыятычны саюз моладзі. У 2000 годзе стаў дэпутатам Палаты прадстаўнікоў. З 2005 па 2007 год працаваў галоўным рэдактарам часопіса «Планета», які выдаецца «Белтрансгазам».
У 2008 годзе Янчэўскага прызначылі памочнікам Аляксандра Лукашэнкі — начальнікам галоўнага ідэалагічнага ўпраўлення Адміністрацыі прэзідэнта. Праз некалькі гадоў той даручыў яму курыраваць сферу інфарматызацыі і высокіх тэхналогій, што ў 2017 годзе прывяло яго на пасаду кіраўніка ПВТ замест звольненага Валерыя Цапкалы.