У лютым продаж насельніцтвам валюты перавысіў куплю амаль на 32 млн даляраў. Гэта вынікае са звестак Нацбанка. Эксперты «Кошту ўрада» прааналізавалі, што адбывалася на валютным рынку ў мінулым месяцы.
Паводле звестак Нацбанка, у лютым беларусы купілі замежнай валюты на 716,5 млн даляраў, а прадалі — 748,1 млн. У выніку чысты продаж валюты склаў 31,6 млн даляраў. Такім чынам, насельніцтва перапыніла цыкл чыстай пакупкі, які доўжыўся з верасня 2022 года да студзеня 2023-га. За гэты час людзі паспелі папоўніць свае запасы, выйшаўшы ў чысты «плюс» на 532 млн даляраў, то-бок на столькі купілі валюты больш, чым прадалі.
«У лютым два сегменты валютнага рынку фізічных асоб — наяўная і безнаяўная форма — захавалі звыклую тэндэнцыю. Так, напрыклад, наяўную валюту беларусы традыцыйна больш здаюць, чым купляюць, чысты продаж склаў 135,4 млн даляраў. Купля наяўных за месяц знізілася на 5%, а продаж вырас на 4%. З безнаяўнасцю сітуацыя традыцыйна адваротная: за мінулы месяц фізасобы купілі безнаяўнай валюты на 103,8 млн даляраў больш, чым прадалі», — тлумачаць аналітыкі «Кошту ўрада».
Эксперты адзначаюць, што продаж валюты на фоне досыць высокіх паказчыкаў заробкаў кажа пра назапашванне дысбалансу ў эканоміцы.
«Пры росце рэальных заробкаў насельніцтва наўрад ці хацеў бы расстацца з часткай валютных зберажэнняў, тым больш што спажывецкага ажыятажу, які патрабуе больш беларускіх рублёў, у краіне не назіраецца», — тлумачаць аналітыкі.