Намеснік міністра замежных справаў Беларусі Юрый Амбразевіч упэўнены, што інфармацыя пра атаку на расійскі самалёт-разведчык у Мачулішчах — фэйк. Такую выснову ён зрабіў на падставе таго, што ўлады Беларусі ніяк не каментавалі гэтую інфармацыю. Пра гэта ён заявіў у каментары агенцтву Reuters.
«Улічваючы адсутнасць афіцыйнай рэакцыі, я глыбока перакананы, што гэта чарговы фэйк, скіраваны на тое, каб падкрэсліць пэўныя недахопы ў нашай нацыянальнай бяспецы», — заявіў Амбразевіч.
Нагадаем, раніцай 26 лютага ў ваколіцах вайсковага аэрадрома 50-й змяшанай базы Ваенна-паветраных сіл Беларусі ў Мачулішчах (Мінскі раён) мясцовыя жыхары пачулі некалькі выбухаў. Паводле інфармацыі BYPOL, яны сталі вынікам атакі дрона беларускіх партызан на расійскі ваенны самалёт далёкага радыёлакацыйнага выяўлення і кіравання (ДРЛВ) А-50. Як заявіў кіраўнік аб’яднання былых сілавікоў Аляксандр Азараў, самалёт, які ўдзельнічаў у карэктаванні расійскіх ракетных удараў па тэрыторыі Украіны, быў пашкоджаны і «лётаць ужо не зможа».
Пасля гэтага з’явіліся паведамленні, што на мяжы зрабілі больш жорсткім памежны кантроль, а ў вышук абвясцілі выхадца з Крыма, якога называюць датычным да гэтага інцыдэнту. Акрамя таго, у Беларусі пачалі правяраць уладальнікаў дронаў.
Афіцыйна ўлады Беларусі інцыдэнт у Мачулішчах не каментавалі.