Палітзеяволеную Марыю Калеснікаву, якая праходзіла лячэнне ў санчастцы калоніі пасля аперацыі, перавялі ў атрад. Пра гэта паведаміў 16 студзеня телеграм-канал штаба Віктара Бабарыкі.
У штабе паведамілі, што Марыя ўжо выйшла на працу, але «стамляецца пасля змены». Як кажуць паплечнікі, яна адчувае сябе нармальна, пачынае патроху набіраць вагу.
Нагадаем, пра шпіталізацыю Марыі Калеснікавай стала вядома 29 лістапада мінулага года. Яе паклалі ў першае хірургічнае аддзяленне і перавялі ў рэанімацыю бальніцы хуткай медыцынскай дапамогі ў Гомелі. Адвакат Калеснікавай высветліў, што яе даставілі ў бальніцу з хірургічнай паталогіяй (ёю аказалася прабадная язва) і прааперавалі 28 лістапада.
Аперацыя прайшла паспяхова, але Марыя заставалася ў цяжкім стане. 5 снежня яе перавялі з бальніцы ў медыцынскі стацыянар калоніі, і яна змагла ў палаце сустрэцца з бацькам.
Марыя Калеснікава, якая кіравала штабам Бабарыкі пасля арышту самога палітыка і ягонага сына, знаходзіцца за кратамі з восені 2020 года. У верасні 2021-га яе асудзілі на 11 гадоў калоніі. Яна адбывае пакаранне ў ПК-4 Гомеля.