На перамовах 19 снежня Мінск і Масква найперш абмяркуюць пытанні стратэгіі, асабліва ў эканамічнай сферы. Пра гэта Аляксандр Лукашэнка расказаў сёння на нарадзе па пытаннях беларуска-расійскага супрацоўніцтва, паведамляе яго прэс-служба.
«На блізкай сустрэчы мы абмяркуем пытанні стратэгічнага характару. Пытанні стратэгіі — перш за ўсё ў сферы эканомікі. Так, мы будзем гаварыць пра ваенна-палітычную сітуацыю вакол нашых дзяржаваў. Вядома, мы не адыдзем ад пытання не толькі ВПК, але і будзем гаварыць пра абароназдольнасць, бяспеку. Але галоўнае — гэта эканоміка», — сказаў ён.
Лукашэнка таксама дадаў, што «суверэнітэт і незалежнасць Беларусі непарушныя».
«Многія ў нас тут пачынаюць шаптацца, калі не атрымліваецца дамовіцца, што Расія ставіць непрымальныя для нас умовы, звязаныя з нашай незалежнасцю і суверэнітэтам. Абсалютна шчыра кажу: пры ўсіх складанасцях, калі Расійская Федэрацыя — кіраўніцтва — хоча будаваць адносіны з незалежнай суверэннай дзяржавай Беларусь, калі Расія ўспрымае нас як суверэнную і незалежную дзяржаву (але вельмі блізкую, вельмі надзейную, дзе ўсё рускае — ад мовы да расійскіх традыцый — свята ўшаноўваецца), мы гатовыя выбудоўваць адносіны. Але мы павінныя заўсёды зыходзіць з таго, што мы — дзяржава суверэнная і незалежная», — падкрэсліў Лукашэнка.
Ён адзначыў, што «мы ніколі не будзем ворагам Расіі. І ніколі коса ў бок Расіі глядзець не будзем».
«Гэта самая блізкая нам дзяржава, самыя блізкія нам народы. Думаю, пакуль мы з вамі пры ўладзе, мы будзем прытрымлівацца такой тэндэнцыі. Калі б было інакш, было б як ва Украіне. Усе гэта разумеюць, але не ўсе могуць пра гэта гаварыць. Тыя, хто збег, ім трэба зарабляць грошы на жыццё. Грошы хтосьці даў, сказаў, як сказаць, — яны кажуць. Таму суверэнітэт і незалежнасць непарушныя. І ўсякія размовы ў нас ці там (за мяжой. — Заўв. рэд.) інакш — гэта значыць здрада інтарэсам беларускага народа», — заявіў палітык.
Нагадаем, раніцай 16 снежня стала вядома, што прэзідэнт Расіі Уладзімір Пуцін прыляціць у Мінск на перамовы з Аляксандрам Лукашэнкам.