У Беларусі ў 2023 годзе хочуць падняць стаўку падатку на прыбытак да 20%. Цяпер яна складае 18%. Гэта прадугледжана праектам зменаў у Падатковы кодэкс.
Цяпер падатак на прыбытак — 18%. Але абласныя саветы дэпутатаў і Мінгарсавет дэпутатаў могуць павялічваць стандартную стаўку гэтага збору на два працэнтныя пункты. Некаторыя рэгіёны сёлета выкарысталі такую магчымасць. У 2023-м іх хочуць яе пазбавіць, замест гэтага могуць увесці па ўсёй краіне стаўку падатку на прыбытак на ўзроўні 20%.
Чыноўнікі таксама плануюць у 2023 годзе падоўжыць для аператараў сотавай сувязі дзеянне павышанага падатку на прыбытак. Апошнія два гады гэты збор складае 30% (раней — 18%). Павышаны падатак, як плануецца, будзе дзейнічаць да 1 студзеня 2025 года.
Падатак на прыбытак у 30% на найбліжэйшыя два гады таксама прадугледжаны для камерцыйных мікрафінансавых арганізацый, якія ўключаныя ў рэестр мікрафінансавых арганізацый. Цяпер гэты збор складае 25%. Павышаны падатак хочуць увесці да 1 студзеня 2025 года.
Нагадаем, раней Бізнес-саюз прадпрымальнікаў і працадаўцаў у ліпені паведамляў, што ў Беларусі разглядаюць магчымасць падняць падатак на прыбытак, а таксама ПДВ да 23%. Як сцвярджалася, такія дыскусіі вяліся ва ўрадавых колах. Паведамлялася, што да павышэння ставак падаткаў падштурхоўвае жорсткі дэфіцыт бюджэту.
Удакладнім, што гэтыя магчымыя падатковыя змены яшчэ не прынятыя. Пры гэтым зацверджаны канчатковы варыянт правак чыноўнікаў у Падатковы кодэкс можа адрознівацца ад папярэдніх версій правак у гэты дакумент.
