Папулярны беларускі комік Слава Камісаранка абмяркоўваў з юрыстам камунікацыю з Інтэрпалам пасля таго, як яго абвясцілі ў вышук у Беларусі і Расіі. Пра гэта ён расказаў падчас травеньскага канцэрта ў Таліне, відэа якога днямі выклаў на YouTube. Нагадаем, на радзіме на стэндапера завялі крымінальную справу па трох артыкулах, у тым ліку за паклёп на Лукашэнку.
Паводле коміка, у Беларусі ён афіцыйна знаходзіцца ў вышуку, а ў Расіі — неафіцыйна. «І нядаўна я размаўляў з адным юрыстам, ён кажа: „А ты разумееш, што цябе могуць абвясціць у міжнародны вышук, а потым запатрабаваць тваёй выдачы?“» — расказаў Камісаранка.
«Я заўсёды марыў выйсці на міжнародны ўзровень. Але як комік, а не злачынец, разумееце? Буду потым з іншымі размаўляць, яны такія — намі цікавіцца Netflix. А я такі — а мной Інтэрпал», — пажартаваў Камісаранка.
«Я кажу гэтаму юрысту: „І што ж нам трэба рабіць?“ Ён кажа: „Нам трэба напісаць у Інтэрпал прэвентыўны запыт. Мы павінныя праінфармаваць, што гэта палітычны пераслед праз вашую пазіцыю“», — расказаў комік.
Паводле юрыста, важна напісаць у Інтэрпал раней, чым туды звернуцца беларускія сілавікі.
Беларускія ўлады пасля 2020 года выкарыстоўваюць Інтэрпал як інструмент палявання на палітычных праціўнікаў. Арганізацыя дадаткова правярае запыты, якія прыходзяць з Мінска. Важна, што, згодна з трэцім артыкулам статута Інтэрпала, арганізацыі забараняецца ўключацца ў справы палітычнага, ваеннага, рэлігійнага ці расавага характару. Аднак Нацыянальнае цэнтральнае бюро Інтэрпала ў Беларусі неаднаразова парушала гэты прынцып, «маскіруючы» апазіцыянераў пад звычайных крымінальнікаў з мэтай атрымаць інфармацыю пра іх месцазнаходжанне і потым экстрадыяваць.
Стэндапер таксама расказаў, як некалькі гадоў таму спрабаваў купіць пашпарт карыбскай дзяржавы Грэнады:
«Уявіце, я звязаўся з юрыстам з фірмы, усё яму расказаў. Праз тры дні ператэлефаноўвае і кажа: „Вячаслаў, у мяне цудоўныя навіны — будзе ў вас пашпарт. Глядзіце, што мы робім: я рыхтую дакументы, а вы пакуль едзьце ў Беларусь і вазьміце даведку, што ў вас няма судзімасці“. Я кажу: „Вы нармальны, як вы сабе гэта ўяўляеце? Я прыязджаю і такі — здрасьце, я Слава Камісаранка, дайце даведку. А яны: ды ты ж у крымінальным вышуку! А я: ну дык вы ж мяне не злавілі“».
Нагадаем, Слава Камісаранка — вядомы беларускі стэндапер. Пасля прэзідэнцкіх выбараў у Беларусі 2020 года Камісаранка не раз выказваўся пра іх фальсіфікацыі і асуджаў гвалт з боку сілавікоў супраць пратэстоўцаў. У сваіх выступах ён рабіў пародыі на Аляксандра Лукашэнку і называў яго «чык-чырыкам».
У студзені 2021 года беларускія ўлады адклікалі выдадзеныя дазволы на правядзенне канцэртаў Камісаранкі ў Мінску.
У Следчым камітэце 15 жніўня 2024 года пачалі спецвытворчасць у дачыненні да 39-гадовага стэндапера Вячаслава Камісаранкі, яго абвінавачваюць па трох артыкулах КК:
- «Наўмысныя дзеянні, скіраваныя на распальванне іншай сацыяльнай варожасці і разладу паводле прыкметы іншай сацыяльнай прыналежнасці» (ч. 1 арт. 130);
- «Паклёп на Аляксандра Лукашэнку, які ўтрымліваецца ў публічным выступе і ў інфармацыі, размешчанай у глабальнай камп’ютарнай сетцы Інтэрнэт, спалучаны з абвінавачаннем у здзяйсненні цяжкага злачынства» (ч. 2 арт. 367);
- «Публічная абраза Аляксандра Лукашэнкі» (ч.1 арт. 368).
Комік у адказ на такія навіны анансаваў, што хутка выкладзе свой канцэрт на YouTube, адзначыўшы, што, «з аднаго боку, мяне сёння завочна судзяць па трох крымінальных справах, а з іншага, робяць выдатнае прома для майго канцэрта».
Пра тое, што ў Беларусі на Камісаранку завялі крымінальную справу пра паклёп на Лукашэнку, у лютым 2022 года паведамляў расійскі прапагандыст Канстанцін Прыдыбайла. Сам Камісаранка ў студзені таго ж года расказаў, што з’ехаў з Расіі. У сваім выступе ў Кіеве ён паведаміў, што яго абвясціў у вышук беларускі КДБ.
Чытайце таксама
