Суд Жодзіна за смяротнае ДТЗ пад Смалявічамі, у якім загінулі 13 чалавек, асудзіў галоўнага інжынера філіяла аўтамабільнага парку на два гады калоніі-пасялення, паведамілі ў прэс-службе пракуратуры.
Паводле матэрыялаў справы, 37-гадовы галоўны інжынер працяглы час не рабіў належных захадаў і дзеянняў па службе адносна арганізацыі па месцы захоўвання самазвала МАЗ падчас яго выезду на лінію перадрэйсавага кантролю, а таксама праверкі адпаведнасці тэхнічнага стану грузавога аўтамабіля патрабаванням тэхнічных нарматыўных прававых актаў і тэхнічных рэгламентаў.
Падчас следства высветлілі, што ён дапусціў выпуск на лінію 20 лютага 2023 года і ўдзел у дарожным руху МАЗа з няспраўнасцю хадавой часткі. Гэта прывяло да сутыкнення на 9-м кіламетры трасы Р69 Смалявічы — Шацк самазвала з пасажырскім аўтобусам Citroen Jumper, што пацягнула па неасцярожнасці смерць 13 чалавек.
Таксама ў выніку ДТЗ была нанесеная шкода аўтапарку, цяжкія цялесныя пашкоджанні атрымалі сем пасажыраў Citroen. Матэрыяльныя выдаткі ў выніку ўзнікнення надзвычайнай сітуацыі, аказання медыцынскай дапамогі і лячэння пацярпелых грамадзян перавысілі 270 тыс. рублёў.
На судовым паседжанні абвінавачаны сваёй віны не прызнаў.
Суд прызнаў мужчыну вінаватым па ч. 2 арт. 428 КК (Службовая халатнасць, якая пацягнула па неасцярожнасці смерць чалавека і іншыя цяжкія наступствы) і асудзіў на два гады пазбаўлення волі з адбываннем пакарання ў папраўчай калоніі ва ўмовах пасялення з пазбаўленнем права займаць пасады, звязаныя з выкананнем арганізацыйна-распарадчых абавязкаў, на 5 гадоў.
Прысуд у законную сілу не ўступіў, можа быць абскарджаны і апратэставаны ў апеляцыйным парадку.
Аварыя пад Смалявічамі
Раніцай 20 лютага кіроўца грузавога МАЗа філіяла аўтамабільнага парку № 20 «Мінаблаўтатранса» курсаваў паміж кар’ерам «Верасы» і вёскай Навасады. Яшчэ да таго дня ён выявіў няспраўнасць. Яна была звязаная з «разбурэннем ліста правай рысоры пярэдняй падвескі». Ехаць у такім стане было нельга, але «кіроўца ад паездак не адмаўляўся, а цягам працоўнай змены зрабіў тры рэйсы па перавозцы грузу».
Каля 14.55 ён рабіў чацвёрты рэйс. Самазвал быў загружаны пяском больш чым на 20 тон, што перавышае ўсталяваную заводам масу грузу. Машына ехала з хуткасцю 65−70 км/г. У выніку падчас руху разбурылася правая рысора, і грузавік сутыкнуўся з маршруткай Смалявічы — Мінск.
У аварыі загінулі кіроўца і 12 пасажыраў маршруткі. Па крымінальнай справе пацярпелымі прызнаныя 34 чалавекі. «Мінаблаўтатрансу» і абвінавачанаму заяўленыя пазовы пра кампенсацыю маральнай шкоды на 2 мільёны 370 тысяч рублёў.
Следчы камітэт пасля ДТЗ распачаў крымінальную справу, адбыўся суд: вінаватым прызналі 60-гадовага кіроўцу МАЗа, яго асудзілі на сем гадоў калоніі агульнага рэжыму, ён цалкам прызнаў сваю віну.