Цела чалавека знайшлі ў адсеку шасі самалёта, што прыбыў на Гаваі

У адсеку шасі самалёта ў аэрапорце Кахулуі (горад на востраве Маўі Гавайскага архіпелага) напярэдадні Калядаў знайшлі цела чалавека, піша Hawaii News Now.

У заяве авіякампаніі United Airlines гаворыцца, што самалёт прыбыў на востраў Маўі з Чыкага ў аўторак, 24 снежня. Цела знайшлі ў адсеку шасі асноўнай стойкі самалёта.

«Адсек шасі быў даступны толькі звонку самалёта. Пакуль незразумела, як і калі чалавек трапіў у гэты адсек», — гаворыцца ў заяве United Airlines.

У авіякампаніі дадалі, што супрацоўнічаюць з праваахоўнымі органамі ў межах расследавання.