Большасці невялікіх камерцыйных аптэк хутка забароняць прадаваць лекі па рэцэптах. Гэта звязана з пастановай Міністэрства аховы здароўя, якая ўступае ў сілу з 1 чэрвеня. У ведамстве растлумачылі, чаму такі дакумент прынялі.
«Рашэнне пра забарону на рэалізацыю рэцэптурных прэпаратаў прынятае ў сувязі з тым, што на такія аптэкі паступала больш за ўсё скаргаў што да адпускання прэпаратаў. А рэцэптурныя прэпараты пры няправільным прыёме або ў няправільнай дазіроўцы могуць нанесці шкоду арганізму чалавека або прывесці да больш цяжкіх і негатыўных наступстваў», — заявіў намеснік міністра аховы здароўя Юрый Горбіч.
Нагадаем, цяпер у Беларусі працуе каля 3600 аптэк. Дзяржаўнай сетцы «Белфармацыя» і рэгіянальным «Фармацыям» належыць каля 1850 пунктаў, адпаведна, амаль палову рынку займаюць камерцыйныя сеткі. Усе аптэкі краіны дзеляцца на пяць катэгорый.
Менавіта апошняй, пятай, катэгорыі, да якой і адносіцца большасць камерцыйных аптэк, забароняць прадаваць лекі па рэцэпце.
Пры гэтым Міністэрства аховы здароўя зрабіла выключэнне: прадаваць па рэцэптах па-ранейшаму змогуць аптэкі пятай катэгорыі, якія ажыццяўляюць бясплатнае і льготнае забяспечанне асобных катэгорый грамадзян лекамі і перавязачнымі матэрыяламі. А гэтым займаюцца толькі дзяржаўныя аптэкі, амаль усе з іх адносяцца да сеткі «Белфармацыя» і рэгіянальных «Фармацый» (яшчэ ёсць 26 аптэк РУП «Белекацэнтр» у Мінску). Такім чынам, невялікія дзяржаптэкі з-пад удару выведзеныя.
Забарона прадаваць рэцэптурныя лекі пагражае камерцыйным аптэкам зніжэннем колькасці кліентаў, змяншэннем выручкі, не выключана, што нейкім аптэкам давядзецца закрыцца. Забарона адаб’ецца і на простых людзях. Напрыклад, у горадзе Смалявічы хутка застанецца ўсяго тры аптэкі, дзе можна купіць лекі па рэцэпце ўвечары пасля працоўнага дня, і толькі адна, дзе гэта можна зрабіць у нядзелю. Такія праблемы пагражаюць большасці невялікіх гарадоў Беларусі.
