Захапіць «замежніка з фальшывым пашпартам», які нібыта рыхтаваў тэракты ў Гродне, спачатку збіраліся жывым, але падчас аперацыі давялося яго «бездакорна» застрэліць. Пра гэта заявіў у эфіры «Беларусь 1» памочнік Лукашэнкі па Гродзенскай вобласці, экс-міністр МУС Юрый Караеў.
Паводле версіі Караева, «ліквідацыя замежніка» ў Гродне 19 сакавіка праходзіла так: спачатку падазраванаму ўдалося «даць пару добрых чэргаў» з аўтамата, потым ён кінуў у групу захопу гранату, тая адскочыла ад шчыта і ўпала пад ногі аднаму з байцоў.
— Ён (спецназавец. — Заўв. рэд.) яе адшпурнуў у суседні калідорчык, які вядзе да кухні, і там яна выбухнула, — сказаў Караеў.
Ён пахваліўся, што падчас агляду кватэры «забітага замежніка» нідзе не ўбачыў прабоін ад куляў сілавікоў у адказ, «то-бок усе ўвайшлі куды трэба».
Паводле Караева, спачатку мужчыну збіраліся захапіць жывым, але гэтага зрабіць не ўдалося, бо ён аказаў супраціў:
— Калі ён зрабіў так, што не пакінуў сабе шанцаў, то яны выступілі і зрабілі ўсё бездакорна.
Караеў звярнуў увагу, што байцы спецназа «былі экіпіяваныя па поўнай», каб выключыць паражэнне, а «браняшчыт паказаў сябе як надзейны».
— Мы не ў Дамаску і не ў цэнтры тэрарызму, у нас бяспечная краіна. Калі тэрарысты з іншых краін на нашую тэрыторыю прыходзяць, у нас адказ адзін: мы іх будзем браць і знішчаць, — паабяцаў ён.
Гаворачы пра сённяшнія настроі ў Гродне, памочнік Лукашэнкі заявіў, што «нашыя людзі пасля 2020 года паціху, паволі, але разабраліся, што магло быць, дзе і на чыім баку праўда», і зрабілі выбар на карысць «спакойнага, бяспечнага жыцця», а не «сумнеўнага нейкага там рыўка наперад з тэхналогіямі».
— Людзі разабраліся, што галоўнае пасля ежы — гэта спакой, бяспечнае жыццё. Адсюль усе вытворныя: спакойна гадаваць сваіх дзяцей, глядзець, як іх паспяховасць у школе, каб яны не сваволілі, каб дома быў дастатак, — апісаў Караеў, як, на яго думку, выглядае беларускае шчасце.
Падведамную яму Гродзенскую вобласць ён назваў «нашым заходнім фарпостам» і расказаў пра тамтэйшую мірную абстаноўку.
— У нас хуліганы такія, што яны нікога не чапаюць, яны паміж сабой там матам лаюцца. Я не памятаю ўжо вулічных рабаванняў. У нас ледзь што — адразу міліцыя, унутраныя войскі на месцы і камеры ўжо ўсюды, — запэўніў Караеў.
Нагадаем, удзень 19 сакавіка ў Гродне былі чутныя выбухі і страляніна, была інфармацыя і пра затрыманні. Пазней КДБ паведаміў пра «ліквідацыю замежніка», які, паводле версіі сілавікоў, планаваў тэракт і аказаў супраціў «з выкарыстаннем аўтаматычнай зброі і шляхам падрыву баявых гранат».
КДБ распачаў крымінальную справу за падрыхтоўку да здзяйснення акту тэрарызму. Паводле заявы ўладаў, яго закінулі з Польшчы «збеглыя экстрэмісты». У «ліквідаванага замежніка» пры сабе быў падроблены расійскі пашпарт на імя Аляксея Ламакіна. Ён нібыта рыхтаваў тэракты на прамысловых прадпрыемствах і супраць сілавікоў і кіраўніцтва Гродзенскай вобласці. У межах следства ўжо дапытаныя 14 чалавек, якія пры розных абставінах размаўлялі з падазраваным. Пяць чалавек змешчаныя ў следчы ізалятар. Сярод іх — уласніца кватэры, якую здымаў мужчына, пенсіянерка Алена Касцевіч, а таксама яе сын Аляксандр, які займаўся пытаннямі арэнды. У аб’яднанні былых сілавікоў Беларусі BYPOL назвалі тое, што адбылося, інсцэніроўкай, у якой ролю «замежніка» сыграў супрацоўнік КДБ.