Лукашэнка зняў з пасады начальніка міліцыі Мінскай вобласці. Чым ён цяпер зоймецца

Аляксандр Лукашэнка прызначыў генерал-маёра міліцыі Аляксандра Астрэйку начальнікам Акадэміі МУС. Пры гэтым ён вызвалены ад пасады начальніка ўпраўлення ўнутраных справаў Мінскага аблвыканкама, паведаміла прэс-служба Лукашэнкі.

Аляксандр Астрэйка — ураджэнец Капыльшчыны, выпускнік Мінскага вайскова-палітычнага вучылішча і Акадэміі МУС. Пачынаў службу ўчастковым, прайшоў шлях да начальніка РАУС у Слуцку і Салігорску, потым стаў намеснікам начальніка УУС Мінаблвыканкама. З 2021 года — яго кіраўнік, з 2018-га — генерал-маёр міліцыі.

На месца Астрэйкі прызначаны цяперашні начальнік упраўлення ўнутраных справаў Віцебскага аблвыканкама генерал-маёр міліцыі Андрэй Любімаў. А яго вызваленую пасаду цяпер зойме палкоўнік міліцыі Максім Субота.

Указ пра кадравыя перастаноўкі ў сістэме МУС Лукашэнка падпісаў 8 красавіка.

Нагадаем, ранейшы начальнік Акадэміі МУС генерал-маёр міліцыі Аляксандр Васільеў быў вызвалены ад пасады 12 сакавіка. Указам Лукашэнкі ён быў залічаны ў распараджэнне міністра ўнутраных справаў.

Да апошніх прызначэнняў у сацсетках ВНУ намеснік Васільева Аляксей Башан называўся выканаўцам абавязкаў па пасадзе начальніка Акадэміі МУС.