Прапампоўка нафты праз трубаправод «Дружба» прыпыненая. У «Белнафтахіме» кажуць, што ў краіне створаныя дастатковыя запасы

Прапампоўка нафты праз трубаправод «Дружба» была спыненая з 19 снежня праз тэхнічныя праблемы. Пра гэта Reuters паведамілі тры крыніцы ў галіне.

Крыніцы расказалі, што праблема ў сістэме «Транснафты» была выяўленая на помпавай станцыі Унеча, адной з найбуйнейшых у Цэнтральнай Расіі. Яны дадалі, што пастаўкі расійскай нафты ў Беларусь і краіны ЕС былі парушаныя. Адна з крыніц паведаміла, што праблема можа быць вырашаная цягам некалькіх дзён, а другая лічыць, што паставак не будзе да канца месяца.

Гэтую інфармацыю дзяржагенцтву БЕЛТА павердзілі ў «Белнафтахіме».

«Пастаўкі нафты сапраўды прыпыненыя. У краіне створаныя дастатковыя запасы для бесперабойнай працы НПЗ, абодва заводы працягваюць сваю стабільную працу, забяспечваючы адгрузкі нафтапрадуктаў у поўным аб’ёме як на ўнутраны рынак, так і на экспарт», — расказалі ў канцэрне.

Нафтаправод «Дружба», які злучае радовішчы РФ з еўрапейскімі НПЗ, па-ранейшаму транспартуе аб’ёмы сыравіны ў Венгрыю, Славакію і Чэхію, а таксама транзітныя аб’ёмы казахстанскай нафты ў Германію.

Пастаўкі нафты Urals праз «Дружбу» ў цяперашні час складаюць каля 300 000 барэляў за суткі (1,3 мільёна тон за месяц) і застаюцца асноўнай сыравінай для НПЗ кампаніі MOL у Венгрыі і Славакіі.