«Мы рускія, з намі Бог». Расказваем пра футбольныя «Хімкі» — галоўны спартыўны Z-клуб Расіі (ёсць у складзе і беларус)

31 кастрычнiка 2022 у 1667226780
«Зеркало»

Пасля першага круга чэмпіянату Расіі яны ідуць на перадапошнім месцы - ніжэй толькі «Тарпеда». Апошні раз «Хімкі» перамагалі 7 жніўня. У пасіве каманды, як і ў «Арэнбурга», больш за ўсё прапушчаных мячоў. Здавалася б, чаму мы гаворым пра расійскага аўтсайдара? «Хімкі», за які выступае і беларускі футбаліст, прыцягваюць увагу медыя скандаламі, якія пастаўляюць з зайздроснай рэгулярнасцю. Некаторыя інцыдэнты звязаныя і з вайной ва Украіне - пераканайцеся самі.

Волкаў

У васьмі матчах чэмпіянату з 15, у тым ліку ў апошнім, за «Хімкі» гуляў 25-гадовы беларускі абаронца Захар Волкаў. Атрымаў чатыры жоўтыя карткі. Футбаліст перабраўся ў падмаскоўную каманду мінулай зімой з БАТЭ. Прычым дэбютаваў у расійскай прэм'ер-лізе на трэці дзень з пачатку вайны ва Украіне.

«Хімкі» не збянтэжыў той факт, што абаронца правёў усю кар'еру ў Беларусі. Да таго ж у 2020-м ён атрымаў двухгадовую дыскваліфікацыю за дамоўны матч (у верасні 2021-га выкананне астатняй часткі пакарання было адкладзенае на два гады). Усё здарылася тады, калі абаронца выступаў за наваполацкі «Нафтан». У ліпені 2017 года яго каманда саступіла «Крумкачам» (1:2) у Кубку Беларусі, а Волкаў атрымаў 1450 даляраў за забеспячэнне патрэбнага выніку.

- Мы сачылі за ім, калі «Хімкі» яшчэ выступалі ў ФНЛ (другі па рангу дывізіён у Расіі. - Заўв. рэд.), але на той момант Захар лічыўся адным з самых перспектыўных футбалістаў Беларусі і быў для нас - каманды ФНЛ - не па кішэні. Потым здарыўся гэты інцыдэнт, пасля якога мы ўзялі паўзу. Калі ён адбыў дыскваліфікацыю і аднавіў кар'еру, мы вярнуліся да ідэі падпісання Волкава, ужо будучы камандай РПЛ. Спыталі ў людзей, якія былі ў курсе сітуацыі. Зразумелі, што непасрэднага ў гэтай гісторыі футбаліст не ўдзельнічаў, - каментаваў трансфер Волкава спартыўны дырэктар «Хімак» Дзмітрый Ульянаў.

Паводле яго словаў, перад пачаткам перамоваў у клубе «ўлічылі ўсе рэпутацыйныя рызыкі». Зрэшты, каго цяпер у «Хімках» хвалюе імідж?

Даўгі

ФК «Хімкі» быў заснаваны ў 1997 годзе. У прэм'ер-лізе пакуль правёў пяць сезонаў. Найлепшы вынік - 8-е месца ў сезоне-2020/21. Двойчы каманда дабіралася да фіналу Кубка Расіі.

У гэтым чэмпіянаце ёй ужо паспелі пакіраваць тры трэнеры. Сезон пачынаў Сяргей Юран (пры ім «Хімкі» і выйгравалі апошні раз), потым прыйшоў Мікалай Пісараў, якога змяніў Спартак Гагніеў. Новы рулявы пакуль ніяк не можа выправіць нахіл - каманда не перамагае 15 матчаў запар. Не дапамагаюць нават карагоды пры стандартах у чужой штрафной. Пры гэтым Гагніеў не здольны кантраляваць эмоцыі. Так, у апошнім матчы ён яшчэ ў першым тайме замяніў капітана Дзяніса Глушакова і паслаў яго. Пасля свайго выдалення Гагніеў аблаяў журналіста. А потым трэнер вельмі бурна радаваўся голу сына інвестара «Хімак».

Пры гэтым у канцы верасня была інфармацыя, што клуб вінны футбалістам заробак за тры месяцы. Не былі выплачаныя прэміяльныя і за мінулы сезон.

- Дзесьці гэта жарт, дзесьці праўда, але ў Захара [Волкава] усё добра, не скажу, што ў яго ёсць праблемы фінансавыя. Мы беларусы, нам хапае на што жыць. Ён аднавіўся пасля траўмы, дзякуй богу, далей, спадзяюся, будзе гуляць у складзе. А пра тое, што вы кажаце, - ёсць моманты. У Беларусі ў многіх клубах ёсць праблемы з затрымкамі заробку. У Расіі, можа, гэта новае, - гаварыў у сярэдзіне кастрычніка пра нявыплаты заробку агент Волкава Віталь Ледзянёў.

На мінулым тыдні паведамлялася, што ў дачыненні да кіраўніцтва «Хімак» за даўгі могуць распачачаць крымінальную справу. Але ў гэта неяк слаба верыцца. Бо ва ўра-патрыятызме з падмаскоўным клубам сёння ніхто не параўнаецца.

Акцыі

1 кастрычніка на матчы з ЦСКА «Хімкі» на пусты трыбуне вывесілі банэр у падтрымку «спецыяльнай ваеннай аперацыі». На палатне намаляваны салдат з літарай Z, якая стала сімвалам расійскага ўварвання ва Украіну, а таксама надпіс «перамога будзе за намі!»

- Мы хочам, каб абаронцы нашай Радзімы як у тыле, так і на перадавой адчувалі падтрымку грамадства. У гэты няпросты час асабліва важная кансалідацыя футбольнай супольнасці. Сённяшняя сацыяльна-палітычная павестка нікога не пакідае ўбаку. Сёння думкі многіх людзей аб'яднаныя адной мэтай. Мы верым у мужнасць і перамогу нашых воінаў. Мы хочам, каб яны як мага хутчэй вярнуліся дадому да сваіх родных жывымі і здаровымі! - было сказана ў заяве на сайце клуба наконт банера.

Цікава, што гэтую ініцыятыву раскрытыкавалі фанаты «Хімак». Паводле іх словаў, гэта была «спроба выслужыцца новых ці не вельмі новых людзей на хвалі #урапотреотизма».

На наступным хатнім матчы, 15 кастрычніка, у клубе арганізавалі збор сродкаў «на дапамогу мабілізаваным хімчанам». Гульню наведала толькі 2500 гледачоў. Сабраць атрымалася крыху больш за 900 тысяч расійскіх рублёў (каля 15 тысяч даляраў). Затое на форме футбалістаў з'явіўся расійскі сцяг і георгіеўская стужка «на знак салідарнасці з Узброенымі сіламі РФ і падтрымкі абаронцаў Радзімы».

Потым было запрашэнне святара. Ён блаславіў футбалістаў на перамогу, асвяціў поле, распранальні. Пабываў нават у сталоўцы. Але пакуль нешта не дапамагае. Прынамсі, у апошніх двух турах у гасцявых матчах «Хімкі» зняважылі - 0:5 ад «Спартака» і 1:6 ад «Дынама».

Па словах намесніка гендырэктара па развіцці клуба Аляксея Кыласава, з'яўленне бацюшкі было звязанае з тым, што «мы шукаем духоўнасць і сілу, каб пераадолець той ланцуг непрыемнасцяў, які склаўся ў сілу розных абставінаў».

- Мы не адмаўляем, што мы рускія людзі. Як кажа прэзідэнт, мы жывем у рэчышчы традыцыйных духоўных каштоўнасцяў, і для нас гэта не з'яўляецца ніякай дыскусіяй. Гэта з'яўляецца простай канстатацыяй таго, што мы рускія, з намі Бог.

Церушкоў

Усе акцыі клуба актыўна падтрымлівае дэпутат Дзярждумы ад «Адзінай Расіі» Раман Церушкоў, якога лічылі куратарам «Хімак». Так, ён сказаў, што «абсалютна нармальная практыка - калі запрашаюць святара». Маўляў, яна (практыка) не звязаная са спартыўнымі вынікамі і будзе працягнутая.

Ён назваў Ксенію Сабчак, якая пажартавала з нагоды запрашэння святара, ворагам Божым.

- «Хімкі», самі таго не разумеючы, апынуліся на фронце гібрыднай вайны. Каб перамагчы дзяржаву знутры, трэба разбурыць яе веру, знішчыць яе мову і сцерці яе гісторыю. Вось гэтым і займаюцца нашы ліберальныя ворагі - калектыўны Захад і Амерыка, - заявіў Церушкоў.

І дадаў у іншым інтэрв'ю:

- Непрыстойныя жарты, якія транслююць блюзнерства, маюць на мэце падарваць духоўныя асновы. Гэта тыповы постмадэрн, жаданне іранізаваць з усяго. Калі ніяк не ўдаецца ўшчыкнуць, аргументавана запярэчыць, то ў ход ідуць прымітыўныя формы, і высмейванне - адно з іх. Насмешкам паслядоўна падвяргаюцца: карагод, казакі, падтрымка СВА і, нарэшце, праваслаўная вера.

А тых, хто крытыкаваў «патрыятычныя акцыі» клуба, ён «паслаў бы як найдалей і адправіў на лінію сутыкнення»: «Гэта дакладна не заўзятары, гэта дакладна не грамадзяне Расіі».

Церушкову 42 гады. З 2014 па 2021 год быў міністрам спорту Маскоўскай вобласці. Сёння ён застаецца галоўным спікерам «Хімак», хоць 9 кастрычніка і абвясціў пра выхад з назіральнай рады клуба.

Як ужо вы напэўна зразумелі, дэпутат славіцца адыёзнымі выказваннямі, якія вылучаюцца нават на агульным фоне прапаганды. Напрыклад, 15 ліпеня Церушкоў прапаноўваў прыраўняць змену спартовага грамадзянства да дзяржаўнай здрады. А найлепшай тэнісістцы Расіі Дар'і Касаткінай пагражаў крымінальнай адказнасцю за заклікі выступаць за іншую краіну.

«Каманда-цырк»

Натуральна, уся шуміха вакол футбольнага клуба выклікае здзіўленне. Напрыклад, экс-гулец зборнай Расіі Уладзіслаў Радзімаў заявіў:

- Тое, што адбываецца у «Хімках», у разважнага чалавека ўкладвацца ў галаве не можа. Пачынаючы з дэпутата, які прыходзіць на «Матч ТБ» і ў прэсе крытыкуе кіраўніцтва і трэнера. Заканчваючы бацюшкам, які прыязджаў на стадыён. Напэўна, ужо трэба не асвячаць стадыён, а паніхіду заказваць па «Хімках» у дадзенай сітуацыі.

Салідарны з Радзімавым і вядомы ў мінулым футбаліст Аляксандр Маставы.

- Тое, што там адбываецца, нікому не зразумела. Агіднасць проста, жах. Каманда-цырк.

Вядомы каментатар Дзмітрый Губерніеў раскрытыкаваў Гагніева:

- Ён сябе паводзіць як прыдурак, мэтанакіравана лаецца на камеру, а гэта глядзяць дзеці. Такія людзі не павінныя працаваць у расійскім футболе.

А, магчыма, найбольш ёміста пра беды «Хімак» выказваўся журналіст і каментатар Васіль Уткін:

- Хочаш дамагчыся сапраўднага правалу з трэскам - даручы кіраванне дэпутату. Церушкоў больш заклапочаны сваёй цытаванасцю як народны выбраннік.